祝各位會員聖誕快樂！
Added 2023-12-24 00:00:05 +0000 UTC今日係１２月２４日，首先祝各位會員聖誕快樂！
就咁睇ｈｅａｄｉｎｇ，係咪以為係祝賀文章呢，哈哈，其實我仲想寫下其他嘢架。
如果大家心水清，想必一定知道我係而家住喺澳洲的雪梨（有人叫悉尼，是旦啦），雪梨係一個位於地球南半球的城市，如果講氣候，係會同北半球的城市，會好明顯的啱啱相反的，拿，理論上係啦，認知上都應該係啦。
咁呢，又係呢個話題喇，就係有一啲大師，主張南半球的術數看法，必定要南北調轉先啱嘅。
即係如以八字嚟講，用寒熱明論來解說，咁我哋而家處身嘅澳洲雪梨係夏天嚟嘅，但日曆係寫住１２月２４日，都要以夏天嚟睇；換句話來說，今日出生的朋友仔，本來係叫做子月出生，但必須要以午月咁去睇。
有個天才仲勁，佢發明咗南半球萬年曆，將逢南半球的地支，都要反轉晒，即係而家本來係甲子月，佢就將佢變做甲午月。
最慘真係有人信。
要知道，古人法明天干地支，係有一套口訣去遁出嚟的，今年癸卯年，子月的天干必定係甲，甲子月，係唔會有甲午月架，佢呢個大發明家話改就改，唔知自己係咪整咗個新口訣，叫咩好呢？五龜遁月？唉我真係頭都大埋。
好喇，其實係佢哋太過著重於個氣候（定係自己批唔準，就亂咁整堆嘢出嚟自圓其說？），咁南半球嘅１２月，係咪一定熱架先？好似呢度咁，係冇錯，早幾日大概一星期前，最高去到４０度高溫呀，真係熱得死人；但前幾日開始，又突然間刮起大風，急跌２０度，最終去到１５度，咁重係澳洲夏天喎，日頭凍到要著外套，咁係咪嗰幾日要變返冬天？八字遂日睇？咁要去天文台搵返每日溫度幾錄先得喎。
唔講呢筆，仲有嘅就係，佢只係分南半球，但其實南北半球，赤道以上叫北半球丫，以下叫南半球丫，接近赤道位置，有好多國家都係好熱，近乎係冇冬天嘅，咁又要硬塞個寒熱命論再細分南北半球落去？咁赤道位置的國家又點？駛唔駛整返個赤道萬年曆？加多個冇冬天嘅國家萬年曆？
最犀利嘅係，仲有人主張，南北半球嘅磁場係倒轉，即係東南西北要倒轉嚟睇，前後左右唔同晒，飛星又要調轉嚟飛，其實真係好攞命，你拎個指南針出嚟，睇下喺南半球支指針係咪調轉嚟指，咪知道自己有冇俾人老點囉。
