網上案例：一搬入去就出事的例子
Added 2023-11-24 21:00:04 +0000 UTC自從停咗一輪後，師傅忙到爆炸，其實一直到而家都係，好多公務同私人嘢要處理，所以寫文呢，真係要突然叮一聲，有半個小時俾我，咁我就寫啲嘢分享下啦。但每月流月風佈局，還是必定會分享的，其他文章，就隨緣吧。（笑）
呢排喺網絡上腥風血雨，有啲haters動不動就話人係神棍，所以要喺網上公開講一啲爭議性話題，而家都係少啲好，畢竟師傅一來唔想捲入呢啲鬥爭，二來，我都唔需要咁進取喺網上吵吵閙閙來搏爭生意，又或者走去唱衰人踩低人，呢啲都唔係師傅嘅個性，只係有時見到啲人太過份，睇唔過眼，先喺度講下，以免大家又踩中地雷，因為大家係我尊貴嘅會員嚟嘛。
以下呢個案例，我係喺網上睇到的：
有一點要緊記，高樓大廈話者澳洲叫做apartment/unit的，睇法同獨立屋有分別。
呢間屋，就咁睇，係坎宅，咁個苦主一搬咗入去，事業同婚姻都就嚟撐唔住，即係我理解係，差得好緊要啦。咁究竟，間屋係咪真係差成咁呢？
五年前師傅有開過班教風水，上過堂的學生，應該一睇就知，呢個單位得唔得。
而呢個帖，有很多其他師傅或似懂非懂的人留言分析或教路，睇完都莫名奇妙的，可能呢啲就係電視上風水節目令到人有不少奇怪觀點或理論吧，有興趣可以搵返呢個帖，睇下啲留言，又穿堂煞，又蝴蠂門，一時又話門見膳，一時又話主人房大過廳，又有話左邊兩間房門對間會吵架，又有話主人房內有個廁所，又或者係主人房張床三邊落床，想法易有分歧。。。。
其實有時睇到呢啲帖呢啲留言，都好慶幸自己所學的，並非這些。例如穿堂煞，師傅有時都會話冇事，門沖都係，甚至有時叫客人瞓門沖添，最緊要學識點解，而不是電視節目上的人云亦云。
因為佢就咁話坐北向南，所以唔知邊個山，邊條綫，但呢個局勢，喺九運已經係損丁傷財格局，如果買屋前搵一啲靠譜嘅師傅去搵樓，一定唔會揀呢啲，已經篩走咗啦，唔會出現呢種情況。
咁當然啦，屋內的巒頭，也很重要，樓主冇提供街外景觀，咁樣唔知道仲有冇加劇個嚴重性。而內巒，主人房坐向都一樣。大門喺坎宮，本來係OＫ的，但陽台動方在離宮，咁我相信樓主在家中時，都會開住陽台個窗，多過開住自己個大門，所以呢一點，又係死多兩錢重。
咁佢同老婆都係瞓主人房，咁呢間房坐向有問題，當然會影响佢哋感情同財運。至於左手邊臥室門對間，佢兩個又唔係主喺嗰兩間房，咁關佢哋嗌交又有咩嘢關連先？
屋有屋運，人有人運，間屋唔得，應事應得金唔金，又要睇下佢本人係咪行緊衰運，如果行緊衰運，再加上一間衰屋，衰上加衰走唔甩。
所以我教第一班學生時有講，學識風水很緊要，起碼，唔會俾人昆先啦。
Comments
多謝cfu🥰
Kei Yik
2023-11-25 00:19:14 +0000 UTC
