命理隨筆 - 林作被炒
Added 2023-06-04 07:19:24 +0000 UTC其實師傅有時都有抽人水嘅時候，不過當然後睇住嚟抽，
否則好似呢位老哥咁，抽水抽著水火，
唔係似似都咁好彩，成日抽死人水，食人血饅頭都會冇事架，
有啲題材，係不能抽的，有啲順住個勢抽就有好好效果，
師傅呢幾年都係咁抽，但唔會傻到乜嘢嘢都抽一餐。
林作今似衰咗，命理上有冇得馬後炮呢？
其實咁梗係有，因為我好似都冇成日睇住佢個八字，咁今次就輪到我抽下佢水了：
時日月年 運 年 月
吉丁丙己 癸 癸 丁
時巳子巳 酉 卯 巳
佢個八字，時辰係未知，丁火生於子月，月令為七殺，滿盤火土，咁個子水月令孤兒仔咁，冇嘢好用之下，唯有用七殺啦。
七殺其實係一粒同是非口舌有關係的星，所以佢曾經講過，佢越多是非，人越紅，就係咁解。
因為七殺係用神，除咗大運流年可以幫佢加強呢粒星之外，實際空間去操作，令到佢真係呢方面加強，確實有幫助的，可惜有人走火入魔，今次出事喇。
而家行緊癸酉大運，金水大運嚟，你都預其佢係發展得不錯架啦，個個月搵幾十萬，其實好有交代。
但亦可以睇出，佢喺２０１９年之前，七殺癸水被原局己土食神所尅制，所以佢工作運也不太如意。
一交入酉運，金來生水，財滋弱殺，近呢幾年轉職保險後，確有不錯的成就。
今年癸卯年，七殺透干，咁己土尅癸水係應期嚟，即係用神受尅，咁地支卯酉沖，財星受損，原局子水同流年子卯相刑，即係金水同告受傷，今年其實流年不吉。
拿，佢個師傅應該有同佢講架，如果係我，就叫佢今年在社交媒體唔好咁口臭，突然做下好人，寫多啲正面嘅嘢，抽少啲水，咁今年應該會安全少少，最多喺第二度破下財咁，而唔駛成份工冇咗。
偏財受沖，即係今年財運差喇，佢都差係咁，今年過咗三份之一先出事。
丁巳月，火氣漸隆，大運同年柱又係巳酉，加埋流月，三巳加一酉，下個月係戊午，再下個月係己未，即係話過到今個月，都過唔到下兩個月架喇。
其實本來佢可能冇衰得咁可憐，但今次真係一子錯，滿盤皆落索。
提示一下，林生冇咁快就收檔，佢真正衰運係２０４２後先會到，過埋今年，佢下年又可能翻生，佢係醒目仔，不過用錯方法，可以去小紅書度發展下，或許可以有出路。
