日記～06/06/2021 ～ 踢入黑社會
Added 2025-11-10 13:30:30 +0000 UTC星期日 密雲
昨晚醒左好幾次去厠所，因為訓前飲左一大杯奶（每晚返倉時，都有奶一杯及一個提子包做宵夜）。收音機條猫鬚壞左，昨晚無收音機聽啦！
早上都係6:30起身，今日星期日，會先去球場玩，今日跑了兩個藍球場已經無氣，唯有繼續覆吓信。做完運動就返到飯堂食早飯，再冲涼。好快就有職員帶我地去攞結他，每次兩個人去，要幫其他人攞埋佢地個結他，開心今日終於可以到自己個結他，唔使再用人地個個。雖然個結他比較舊，但音質唔錯，有囚友都話音質好好。
逢星期日，唔同單位（黑社會）就會聚餐，同社團都會叫xx開會，佢地就會聚埋一齊，每個社團都有一個負責人，而社團成員每星期都要夾嘢食當交會費，社團就係咁。社團同社團間係有唔妥，但始終係監獄，大家都會守規矩好，非大件事都唔會打交，只會面阻阻各自為政而矣！好多時佢地都會拉人入社團，但我始終唔會理佢地，但見到有啲小朋友真係被佢地踢入會，因為星期日聚餐就會見到。
今日全日係飯當唱歌，發現有好多歌要改Chord.... 今日可以食腸仔包，當然係枱底交易啦！個腸仔包十非煙架，好貴。可能天氣太熱，個包由下午等到夜晚，好似壞左咁，有啲酸，掉左就算。
