日記-05/06/2001 - 用不完的時間/監頭簿
Added 2025-10-26 03:31:10 +0000 UTC星期六 晴天 28°C
一早起身，無乜嘢做，就寫吓日記，昨晚無食蛋撻啦！停一停先，十飛煙架，都係好貴。今日星期六，半天工作，如常出倉食早飯，之後返workshop 工作，繼續學習車衣領。
每日都有一小時去球場，今日有個 ON 同我打排球，都好，有班人圍圈打吓波，都叫做有得運動吓。打完波沖完涼，又到食飯時間，食完，有位囚友“可樂”話同我捉棋，佢出名棋藝好好，我根本係入獄後才捉棋，基本嘅係小學已經識，但一直都唔喜歡捉棋。可以因為“可樂”太睇小對手，竟然輸左比我，好多囚友都係到圍觀，哈哈！証明驕兵必敗的道理。
食完午餐，返到workshop, 開始畫紙樣，然後剪裁再車，因為唔同size 會畫唔同紙樣，結果發現今期係車大碼，而紙樣錯誤，好在尚有料多左，但要上報及要等星期一才能更改，所以今日唔使做！須要重新畫過，樣版要等星期一問導師攞。係監獄就係咁，時間多到唔知點用，因為無晒好多嘢須要思考，例如唔須要担心交租，唔使諗今晚煮乜餸，無得唱K，無朋友約，無地方去……結他又一星期只可玩一次。所以係監獄係有好多時間，多到唔知點用！也會養懶人。無無聊聊咁又一日！
晚飯後，竟然有囚友同我講，唔同drugs有唔同幻覺，最多幻覺就係大麻。同一個人，竟然話星期日先係週未，佢真係食得太多drugs有幻覺呀！
我個猫仔個耳筒壞左，因為一定要用耳筒先聽到，原來要買就寫監頭簿落order , 監頭簿作用就係比我地落order等等，也可以寫明由家人探訪時支付或在自由糧單扣除，或者係自己個包頭攞錢！（即係入獄時，錢包身份証，衣服等物品，俗稱“包頭”）我寫由糧單扣。職員通知，明天星期日，可以攞到自己結他用，因為有囚友過左界，因為每個期數限攞三個結他出來，所以要排隊。
