日記～3/6/2021 ～ 十八
Added 2025-10-05 11:20:46 +0000 UTC星期四 晴天間中密雲 28°C
清晨5點就醒左，原來個日係收音機聽到周國賢嘅歌，原唱係 Beyond 嘅“十八”，係因為五點醒左就聽吓收音機，咁岩就播原唱版“十八”。6:30起身了，出倉時，又忘記開閘比我，搞到我係最後一個去到飯堂，食完飯就即刻問囚友借本Beyond 全集來抄一抄個首十八，原來啲chord都幾複雜，以我一個小學雞結他手來講，要多多練習！
返到workshop 繼續學習車囚衣嘅衣領，直到去球場，做吓小小運動，寫吓信比工會，安排一吓會務啦！總共今日有五封信要回覆，今日都應該寫唔到咁多信。因為個本Beyond 全集係飯堂，所以食晚飯時再繼續抄寫“十八”，呢首歌我之前係未聽過，因為我當年唔太喜歡Beyobd, 但原來Beyond 啲歌係咁有影響力。
晚飯後有囚友叫我捉棋，但係我棋藝好屎，輸兩局，贏返一局，唔知點解今晚捉棋有好多囚友圍觀。下星期正式開始車衫啦！今晚有蛋撻食，返到房就收到，佢地真係太利害了，定係懲教默許佢地咁做？
PS: 講起“十八” 呢首歌，相信大家一定唔會忘記梁天琦係電影“地厚天高”入面自彈自唱“十八”呢首歌。
