日記～31/5/2021 ～ 被出賣的青春
Added 2025-09-08 07:54:38 +0000 UTC天氣真係太熱，昨晚又醒了好幾次！一早起身，天陰陰想落雨咁，但收音機話清晨六點就已經有29°C 啦！
出倉食早飯，越南仔阿Hop 同新來嘅港人阿聰同一張枱，佢兩個好似有啲火藥味! 食完飯返到Workshop 開工，因為我之前係3U 牌，唔能夠上車位，所以今日要去指模房改牌仔（即係類似身份証，上面有相，寫低晒啲入獄出獄日期，屬於邊個期數，有什麼特別病等等資料嘅牌仔，同身份証size 一樣），其實我自己都唔明3U 嘅真正意思，總之佢地叫我做乜，安排好晒咪照做，總之上到車衣位，加到人工就得。明天要去醫院見醫生才可以做到除3U。
天陰陰，應該會取消出球場，每日都有一小時運動，點知話照去球場，都好呀！可以運動吓。
返到workshop 食包妹時，就落大雨！仲落到好大，咁就係workshop 睇吓書，揾左個囚友幫我修理吓啲頭髮。同新人傾吓計，真係唔明而家啲年青人都係無乜智慧，第一次就幫人帶四公斤可卡因，就即刻被捕，係監獄內的年青人都不約而同，都係話小小貨個陣係無事，一叫你帶多啲貨就出事，十個古惑仔十個都話係咁，擺明係揾佢地個替死鬼，同警察傾好晒，交人交貨，因為佢地十幾歲，判二十年，出返來都已經四十！最珍貴的青春就咁被出賣。佢地都有黑社會背景，佢地都係16 至20歲左右，為了揾快錢，結果就咁係監獄渡過最珍貴的青春。
