日記～25/5/2021～獄中食蛋撻
Added 2025-07-10 10:35:15 +0000 UTC星期二 間中有雨
早睡早起，昨日食左兩個蛋撻，飲左支利賓納，好味道（監獄入面都有暗中枱底交易，何止食蛋糕飲奶茶）。只要你有錢就可以，好難係到解釋，總之有錢，就生活得可以好啲。我過左界去到赤柱，就了解監獄文化，開始叫家人“劃非”。
今早出倉後食完早飯，就返到車衣工場工作，又有新人由“水記” “落山”，我又可以升高一級，工作由洗厠所升到只係關窗，工作是小，人工升左才是最實際。係工場都係無乜嘢好做，都仲未可以埋到衣車位車衣，只係剪吓線頭，點吓啲衫紐數目。今日見到指模房的人，上次家人入左嘅3A電同2A電可以追吓啦！
比較傾得埋嘅囚友都過晒界，開始有啲悶，監獄真係一個是非地，“B仔”想我寫告密信，我唔係傻仔，寫左都寄唔到出去，好快會就被保安退信啦！又話我搞事，所以咪話“遠水不能救近火”推左佢啦！想擺我上枱，傻架你！
我決定埋機車衣，工作多啲，時間會易過啲，人工又高啲，希望友人可以幫到手啦！
今日出左球場唔夠15分鐘，就落大雨要返飯堂，係監獄無嘢做，最好就係去冲涼！
PS: 因為職員有下午茶會請B仔食，而B仔為了賺錢，就偷偷賣比囚友，用當時2021年，用十支煙換到兩個蛋撻加一包飲品。而當時一包煙係賣58元。監獄係一個高消費嘅地方，有錢可以食好啲。
