日記～22/5/2021 ～ 重用郵票
Added 2025-05-29 08:22:58 +0000 UTC星期六 密雲，間中有陽光
星期六，半天工作，都係未夠6:30就醒左，手上已經寫左好多信，準備星期一寄，因為星期一可以寄一封免費信。係倉入面做吓運動，拉吓肋，換好衫，準備出倉食早飯。食完就返到期數工作，一返到去就有好多工作等住做，赤柱車衣期，原來係負責車囚犯嘅衫，而家係夏天，所以係車冬天衫。
自己升左級，唔使再洗厠所，可以摺衫同剪線頭，每升一級，人工加左，工作也不同，不過每次升都要等批文。到了10:30就落球場打波，太陽太利害了，又話密雲，囚友們都唔想打波，大家都坐係陰涼位置吹水。打完波大家就去沖涼，沖涼真係最好玩，係牆外，每人一隔隔，或自己一間房沖涼，但牆內只有一排排花灑頭，大家赤條條，你潑吓我，我潑吓你，又有囚友問吓你借洗頭水或皂液，又見到有人用水桶赤條條做GYM 咁，真係好玩，牆外就會被人話你，歧视你話你基佬！
在球場時派信，自己又收至一大堆信，又要用好多郵票了。有ON 問我攞一啲用過嘅郵票，仲教我如果可以洗走郵票上的油墨，咁就可以reuse 啲郵票！哈哈，又學到新嘢！
下午食完包妹，就開始睇信回信，睇吓書，又到晚飯時間，今日食早係16:00，食晏係17:00....返到倉，整理吓今日收到的歌譜，準備明日攞結他玩！
Comments
💪
Wai Tong Tze
2025-06-01 09:58:37 +0000 UTC
