DanOnTheMove

2024 Sauber F1 launch 採訪後記｜一日一 F1｜第三季（27/30）｜Patrons限定

Added 2024-02-07 00:05:39 +0000 UTC

有啲感觸，同時又更堅定。星期一晚，去咗今年第一次 F1 launch 之後，一離開舉行活動、有超過六〇〇年歷史嘅中世紀古蹟教堂之後，就好有「這麼近那麼遠」嘅感觸。

這麼近，係因為記者會我自己揀坐第二行。近距離見到一直其實都係 Sauber、不過由於賽例容許贊助商冠名贊助車隊而改名 Stake F1 Team（都未係全名）、坐喺台上嘅技術總監 James Key、車隊代表 Alessandro Alunni Bravi、兩位 F1 車手同喺台前嘅 Sauber F1 車隊聯絡人阿 Will，嗰種... 終於可以將一個見咗好耐嘅名，連落塊面嘅感覺係...好得意嘅。

這麼近，亦都係因為記者會後嘅群訪同 one-on-one 訪問時間。細隊有細隊好，比舊年嘅 Alpine 倫敦 launch 再 close 啲、chill 啲、人少啲所以競爭都細。感覺好唔同。受訪者分四角坐唔同位，一般都係兜頭「隊」個 iPhone 埋去錄「保子」（Valtteri Bottas）講嘢，另外我無預約都可以就咁聽吓啲 one-on-one 訪問（正）。我估變咗 Audi 廠隊之後，就唔可以咁。

那麼遠，係因為嚟到 F1 嘅前線活動、刻意退半步、比之前更仔細咁觀察同理解其他 F1 新聞人嘅運作潛規則嗰陣就發現：距離（哈）。可能係因為我始終係 9UP 出身，唔係做採訪出身。

距離 —— 嚟自幾個方面：

1）睇清發佈會台下問台上 VS 完場後圍訪 VS 齋聽 one-on-one 訪問嘅唔同潛規則

2）學識同車隊 comms 部門 VS 唔同陣營嘅 F1 新聞人吹水嘅玩法

3）拿捏自我介紹 VS 自己吹噓嘅分別，難就難在係用英國人嘅眼鏡去睇番自己，我暫時見到佢哋係玩低調兼不經意咁高調🤡

4）即場圍訪，要套料嗰陣嘅時機、鋪排同用辭

5）好好運用科技例如 voice-to-text app、受訪者嘅 social media 等即時推進訪問

6）好好活出思想同言論自由，唔好框住自己發問嘅可能性（原來有啲位我已經變咗籠中鳥）

7）我第一次親身感受香港人喺呢行、或者邊一行都好，同世界係有距離、係見到嘅距離、係好實在嘅距離，但自覺又唔係差好遠嘅距離。我仲消化緊。總之，香港人就係可以選擇放眼世界，特別係由治及興之後。

就係咁，所以有啲感觸。

不過，同時我又更加堅定，我好似 sense 到、但未確實定到個方向。如果我做到（或者做唔到），到時都會率先同你哋 patrons 講。

總結，星期一晚同 F1 記者 Lawrence Baretto（下圖）有一場好有趣、關於佢消息人士嘅對話，可能《心戰室》講吓。嗰晚亦識咗 The Race 嘅資深記者 Edd Straw 同埋 Racefans 嘅 Keith，至於 Sky Sports 嘅 Crofty、Autosport 嘅 Jonathan Noble 同 Sauber Group CEO Andreas Seidl 都有見到，但就未有機會詳談。