Adrian Newey 都有想走嘅一日｜一日一 F1｜第三季（22/30）｜Patrons限定
Added 2024-01-25 14:00:13 +0000 UTC面對死局、無得盡展所長嘅話，就連「F1設計神人」Adrian Newey 都想走。Newey 唯一一次想離開紅牛，就係二〇一四年。
嗰年，平治全新 turbo 混能引擎開始壟斷。紅牛就「英雄被困筲箕灣」，受制於唔夠馬嘅威龍（Renault 現譯雷諾）power unit。就係呢盤「死棋」，令 Newey 想走。
舊年年底，Newey 同《Autosport》話當年：「好簡單、嗰時，雖然呢啲嘢係會發生，但我哋個 power unit 真係無貨交。
「佢哋個廠嘅高層，係高層、唔係做嘢嘅手足，嗰時好似無心投資、無改變現狀嘅決心（二三年，似曾相識）。咁就令人有啲沮喪，因為我哋大家都知，要贏總冠軍一定要滿足三大訴求 —— 人、車、機器，缺一不可。」
不過，Newey 結果都係選擇做留下來的人。點解呢❓
心水清嘅朋友應該知道，Newey 自二〇一四年起喺紅牛集團開始「玩」唔同 project 例如飛機大砲咁，好似設計 Aston Martin supercar Valkyrie、美洲杯帆船賽戰船（下圖二）同 Red Bull HyperCar RB17（下圖一）等等。同步，Newey 開始下放權力、退居二線，栽培接班團隊應付日常設計工作。
良禽擇木而棲。Newey 選擇留下來，係因為有才嘅人都係人，人覺得被重視，就會考慮留低。紅牛似乎為 Newey 同埋自己車隊、喺「死局」當中，搵到策略性退場嘅潛行空間。
然後，Red Bull 喺二〇一八年升咗 Pierre Wache（下圖左）做技術總監（technical director）。Wache 舊年底接受訪問話：「係，佢（Newey）係 irreplaceable，你唔可以搵到人代佢。」
不過 Wache 同時透露：「每日流程嚟講，佢唔喺我哋嘅 process 當中。佢係『打橫嚟』、打橫切入，喺唔同範疇 —— 可以係機械設計、氣動力或者汽車動力學，挑戰我哋。
「因為佢唔多時間俾我哋，你要學曉用佢嘅經驗；唔係要佢同意我哋，而係要佢用經驗去挑戰我哋（嘅所有設計）。」
二〇二二年，Newey 麾下嘅 ground effect F1 戰車開始壟斷。二〇二六年，F1 新車將會有「active」頭尾翼減低阻力，Newey 話方向正確：「呢個先係 the future of road cars。」
居安思危，居危思進、喺困難中尋求進步；先可以臨危不亂，順變重生。
完
第三季《一日一F1》都係 30 篇。如果有興趣重讀前兩季另外 60 篇嘅話，㩒下面個 tag 或者 content search：一日一F1。
